FEDERATA PANSHQIPTARE E AMERIKES

HISTORI                ARKIVI                   KANUNORE          BIBLIOTEKA        INFORMACION                   GAZETA DIELLI                  KRYESIA               FORUM 

Boston, përkujtohet Konica, njeriu i letrave, atdhetari i flaktë
Ilir Ikonomi Zëri i Amerikës 01-05-2009

Dëgjoni intervistën  - Download (MP3)
Dëgjoni intervistën  - Dëgjoni (MP3)

Të mërkurën, në Universitetin Harvard të Bostonit një numër studiuesish shqiptaro-amerikanë u mblodhën për të përkujtuar Faik Konicën, njeriun e shquar të letrave dhe të diplomacisë, eruditin dhe bashkëthemeluesin e organizatës Vatra, i cili ia kushtoi jetën pavarësisë dhe përparimit të Shqipërisë.

Diskutimi për Konicën në Harvard

Në diskutim folën Van Kristo, drejtor i organizatës Frosina, Profesor Gregory Pano i Kolegjit Shtetëror të Salemit, Artur Liolin, kancelar i Kishës Ortodokse Shqiptare në Amerikë dhe Agron Alibali, studiues në Universitetin e Masaçusetsit në Boston. Diskutimi u drejtua nga doktore Ardeta Gjikola e Shkollës Pasuniversitare të Arteve dhe Shkencës në Harvard, universiteti ku edhe studioi Konica.

Në një intervistë për Zërin e Amerikës, zoti Agron Alibali, i cili po merret me një studim për Konicën, thotë se Faik Konica përfaqësonte intelektualin e shquar shqiptar të formuar në Perëndim por të mbrujtur me dashurinë për Atdheun dhe me virtutet më të mira të kombit.

Studiuesi Agron Alibali

Konica ishte ndër diplomatët më të shquar të akredituar në Uashington para luftës së Dytë Botërore dhe në bazë të disa studimeve të fundit, ai kishte një botëkuptim shumë të qartë dhe modern për çështjet kushtetuese.

Zoti Alibali thotë se Konica kishte një bibliotekë personale prej më shumë se 2 mijë librash të cilët deri më sot rezultojnë të humbur. Ai thotë se po përpiqet të gjejë vendndodhjen e këtyre librave për të cilat Konica kishte lenë amanet që t’ja dërgonin në Shqipëri pas vdekjes.

Sipas studiuesit Alibali, Konica njihet mirë por jo sa duhet në Shqipëri prandaj ai propozon ngritjen e një instituti studimesh për Konicën që do të ndihmonte të rinjtë të mësonin për pikpamjet dhe trashëgiminë kulturore e atdhedashëse të këtij njeriu të shquar.